राष्ट्रहित टाईम्स वृत्तसेवा
अहिल्यानगर | प्रतिनिधी
कनेक्ट पिपल वाय एस ब्लू एफ या संस्थेच्या वतीने आयोजित ‘महाराष्ट्र भूषण पुरस्कार २०२५’ हा भव्य सन्मान सोहळा प्रथमच अहिल्यानगर येथे संपन्न झाला. या कार्यक्रमात संपूर्ण महाराष्ट्रातून विविध क्षेत्रात उल्लेखनीय कार्य करणाऱ्या व्यक्तींना त्यांच्या कर्तृत्वाबद्दल गौरविण्यात आले.
कार्यक्रमाचा प्रमुख उद्देश म्हणजे समाजाच्या विविध क्षेत्रांमध्ये आपल्या कार्यामुळे वेगळी ओळख निर्माण करणाऱ्या व्यक्तींचा सन्मान करणे आणि त्यांच्या प्रेरणादायी कार्याचा जागर सर्वसामान्य जनतेपर्यंत पोहोचवणे हा होता.
२२ जून २०२५ रोजी दुपारी ४ वाजता उर्जा रंगमंच, एकता कॉलनी, केडगाव देवी रोड, अहिल्यानगर येथे पार पडलेल्या या पुरस्कार वितरण सोहळ्यात उपस्थित मान्यवर, सामाजिक कार्यकर्ते, विविध क्षेत्रांतील मान्यवर नागरिक आणि नागरिकांचा मोठा सहभाग होता.
या कार्यक्रमात कला आणि सामाजिक क्षेत्रात उल्लेखनीय कार्य करणाऱ्या कु. अमृता दिंगबर म्हेत्रे यांना “महाराष्ट्र भूषण पुरस्कार २०२५” या सन्मानाने गौरविण्यात आले. त्यांनी गेल्या काही वर्षांत सामाजिक जागृती, महिला सशक्तीकरण, सांस्कृतिक कार्यक्रमांचे आयोजन आणि नवोदित कलाकारांना व्यासपीठ उपलब्ध करून देण्यासाठी केलेल्या प्रयत्नांना विशेष दाद मिळाली.
कला क्षेत्रातील त्यांची सृजनशीलता आणि सामाजिक प्रश्नांवरील संवेदनशीलतेमुळे त्यांचे कार्य समाजात सकारात्मक बदल घडवणारे ठरले आहे. ग्रामीण व उपेक्षित भागातील महिलांना आत्मनिर्भर बनवण्यासाठी त्यांनी घेतलेला पुढाकार आणि विविध सामाजिक उपक्रमांची आखणी करताना दाखवलेले नेतृत्व हे उल्लेखनीय आहे.
या सन्मानानंतर कु. अमृता म्हेत्रे यांनी आपले मनोगत व्यक्त करताना सांगितले की, “हा पुरस्कार माझ्या कार्याचा सन्मान तर आहेच, पण ही माझ्यावरची जबाबदारीही आहे. समाजासाठी अजून अधिक व्यापक पातळीवर कार्य करण्याची प्रेरणा या सन्मानामुळे मिळाली आहे. माझ्या या कार्यात सहकार्य करणाऱ्या सर्वांचा मी मन:पूर्वक आभार मानते.”
कार्यक्रमाचे संयोजन अत्यंत शिस्तबद्ध पद्धतीने करण्यात आले होते. संस्थेचे पदाधिकारी, स्वयंसेवक, आणि विविध मान्यवर व्यक्तींनी पुरस्कारप्राप्त मान्यवरांचा गौरव करत कार्यक्रमाची शोभा वाढवली.
‘महाराष्ट्र भूषण पुरस्कार २०२५’ हा केवळ एक पुरस्कार नसून समाजपरिवर्तनासाठी योगदान देणाऱ्या व्यक्तींच्या कार्याला मिळालेली एक प्रतिष्ठा आहे, जी त्यांच्या पुढील वाटचालीसाठी निश्चितच प्रेरणादायी ठरेल.
